Vinnureglur

Eftirfarandi vinnureglur gilda um samskipti innan skólans og út á við í samskiptum við forráðamenn nemenda og aðra skóla hérlendis og erlendis.

Nemendur, kennarar og annað starfsfólk skólans:

sýna hvert öðru virðingu í öllum samskiptum og koma fram hvert við annað af tillitssemi, hvort sem um er að ræða rafræn eða önnur samskipti,
virða það nám og starf sem unnið er í skólanum, vinna verk sín af heilindum og stuðla að því að aðrir geri slíkt hið sama,
leggja áherslu á fagleg vinnubrögð, gagnrýna hugsun og málefnalegan rökstuðning,
gæta þess að vera málefnaleg og sanngjörn í umsögnum,
mismuna ekki hvert öðru, til dæmis vegna kyns, kynþáttar, kynhneigðar, aldurs, fötlunar, þjóðernis, trúarbragða, efnahags eða skoðana,
leggja sig fram við að skila kennslustofu í lok tíma, snyrtilegri, með sömu uppstillingu borða og var áður og með hreinni töflu,
eru virkir í starfi og þróun skólans og vinna saman að því að bæta starf hans,
gæta virðingar og almennrar kurteisi í samskiptum við ytri aðila. Starfsfólk og nemendur skólans hafa hugfast að þeir eru fulltrúar skólans í ytri samskiptum,
hafa hagsmuni skólans, nemenda og starfsfólks að leiðarljósi í samskiptum við utanaðkomandi aðila.

Nemendur skólans:

eiga að vera búnir að útvega sér námsbækur/gögn innan viku eftir að skóli hefst. Ef misbrestur er á því fara umsjónarkennarar í málið (hafa samband heim),
eiga ávallt að koma með kennslubækur/gögn og geri sig tilbúna til náms í upphafi hvers tíma, Það er,; að finna til bækur og annað sem nota skal, slökkva á síma og tölvu nema kennari leyfi annað,
neyta ekki matar eða drykkja í kennslustundum nema með leyfi kennara.
ganga frá eftir sig þegar þeir yfirgefa rýmið.

Starfsfólk skólans:

ber að hafa hagsmuni nemenda að leiðarljósi og gæta trúnaðar við nemendur og forráðamenn,
hefur upplýsingaskyldu gagnvart forráðamönnum ólögráða nemenda. Þeim ber að tilkynna til barnaverndaryfirvalda ef grunur er um brot á 16. og/eða 17. gr. Laga nr. 80 frá 2002,
skal virða ákvörðunarrétt forsjárforeldra/forráðamanna ólögráða nemenda og hafa ekki samband við sérfræðinga utan skólans um málefni nemanda nema slíkt sé óhjákvæmilegt til að tryggja velferð og rétt barnsins,
ber að hafa samvinnu við forráðamenn eftir þörfum og gæta þess að upplýsingar sem þeir veita forráðamönnum séu áreiðanlegar og réttar,
kennarar fylgja siðareglum Kennarasambands Íslands,
kennarar skila einkunn, umsögn eða annarri endurgjöf verkefna og prófa eins fljótt og kostur er,
kennarar leyfa nemendum að fara 10 mínútum fyrir tímaskipti, sem ekki liggja að frímínútum eða hádegishléi, þegar þeir eru að fara í eða úr íþróttatíma í Íþróttahúsinu.

Valmynd