VÉLS2VA05(BV) - Vélstjórn 2 - Keyrsla og bilanagreining véla

Lýsing

Einingafjöldi : 5

Þrep: 2

Forkröfur: VÉLS1VA05(AV)

Í áfanganum öðlast nemandinn þekkingu á helstu véla- og lagnakerfum um borð í skipum, uppbyggingu þeirra, hlutverki, notkun og viðhaldi. Að auki kynnist nemandinn uppbyggingu skutpípu, skiptiskrúfu og niðurfærslugíra, ásamt helstu dælugerðum. Farið er yfir eldsneytisbúnað dísil- og Ottóvéla og mismunandi tegundir eldsneytis, efnasamsetningu og eiginleika, ásamt rekstri og viðhaldi kælivatns- og sjókælkerfa. Áhersla er lögð á umhirðu búnaðar í vélarúmi, bilanagreiningu og viðgerðir ásamt helstu öryggisatriðum varðandi eldvarnir skipa, flokkun og eftirlit. Farið er yfir öryggismál, umgengni um vélar og verkstæði ásamt hættum sem stafa af vélum og vélbúnaði. 

Þekkingarviðmið:

Nemandi skal hafa öðlast þekkingu og skilning á:

• helstu öryggisatriðum varðandi rekstur og viðhald smærri skipa

• eldsneytisbúnaði dísil- og Ottóvéla og loftaðfærslubúnaði miðað við algengustu eldsneytistegundir

• helstu dælugerðum kostum þeirra og annmörkum

• algengum aðferðum við aflyfirfærslu frá vél að skrúfu

• hinum ýmsu kerfum í skipum, hlutverki, uppbyggingu og notkun þeirra og viðhaldi

• algengum gerðum af þrýstivökvakerfum og vökvastýrisvélum

• uppbyggingu skutpípu og þéttingar hennar við skrúfuás

• uppbyggingu skiptiskrúfunnar

• uppbyggingu niðurfærslugíra með og án úttaka og hlutverki þrýstilegu

• herslum mismunandi bolta eftir efnisgæðum og gerð

Leikniviðmið:

Nemandi skal hafa öðlast leikni í að:

• nota skjámyndakerfi við stjórnun vélarúms (vélarúmshermir)

• beita rökhugsun

• rekja og teikna upp helstu kerfi um borð í smærri skipum (s.s. lensikerfi, neysluvatnskerfi)

• lesa úr einlínu- og þversniðsmyndum

• ganga um vélar og verkstæði með tilliti til hreinlætis og öryggis

Hæfniviðmið:

Nemandi skal geta hagnýtt þá almennu þekkingu og leikni sem hann hefur aflað sér til að:

• bilanagreina vélar á skipulagðan hátt

• annast daglegan rekstur lítils vélarúms

• sinna fyrirbyggjandi viðhaldi í litlu vélarúmi (s.s. olíu- og síuskipti)

• útskýra mismunandi gerðir og uppbyggingu tengsla (kúplinga), gíra og skipsskrúfa

• stunda vinnu á vélaverkstæði m.t.t. umgengni og öryggismála

Námsmat: Námsmat er skilgreint í námsáætlun í samræmi við skólanámskrá og nánar útfært í verklagsreglum skólans sem birtar eru í gæðahandbók.