Skólareglur

Skólareglur Framhaldsskólans í Vestmannaeyjum

Til þess að ná þeim markmiðum skólans um að búa nemendur undir að takast á við kröfur daglegs lífs, framhaldsnám og störf er nauðsynlegt að þeim sé skapað gott námsumhverfi. Með aukinni áherslu á símat í námi er mikilvægt að nemendur mæti vel í skólann og sinni náminu jafnt og þétt. Almennar skólareglur, reglur um skólasókn og reglur um vinnubrögð eru hluti af góðu og skipulögðu námsumhverfi og leiðbeinandi fyrir nemendur á námsvegferðinni. Nemendum ber að kynna sér skólareglur og fara eftir þeim. Þeir get ekki komið sér undan brotum á reglum með því að beita fyrir vanþekkingu á þeim. Skólameistari og skólaráð fjalla um brot á reglum þessum og ákveða viðurlög.

• Innan skólans gilda landslög sem skólareglur án þess að þeirra sé sérstaklega getið.
• Gagnkvæm virðing, kurteisi og heiðarleiki skal ríkja í samskiptum nemenda og starfsfólks.
• Kurteisi og gott siðferði ber að viðhafa í skólanum og alls staðar þar sem komið er fram í nafni hans.
• Vinnufriður á að ríkja í tímum. Kennari er verkstjóri í kennslustundum og ber nemendum að fara eftir fyrirmælum hans svo allir sem mættir eru í kennslutíma geti unnið að námi sínu.
• Nemendum ber að mæta á réttum tíma, vera undirbúnir, með viðeigandi námsgögn og vera virkir í kennslustundum.
• Nemendum ber að hlýða fyrirmælum starfsfólks.
• Virða skal markmið skólans, stefnu hans og reglur og ávallt gæta að skerða ekki heiður hans.
• Nemendur bera sjálfir ábyrgð á verðmætum sínum.
• Notkun farsíma eða annarra snjall­tækja í kennslu­stund skal ávallt vera í samráði við kennara. Kennari ber ábyrgð á verklagi í sínum kennslustundum og hefur því fullt umboð skólans til að leyfa eða banna notkun snjalltækja. 
• Nemendum er óheimilt að taka myndir eða myndefni af öðrum einstaklingum á skólasvæðinu án þeirra samþykkis. Stranglega bannað er að birta slíkt myndefni á netinu, samfélagsmiðlum eða öðrum vettvangi án leyfis viðkomandi einstaklings. 
• Nem­endum ber að ganga snyrti­lega um húsa­kynni skólans og fara vel með þá muni skólans sem þeir nota og þeir fá að láni í tengslum við kennslu og/eða aðra starfsemi í skólanum.
• Skemmdir sem nemendur kunna að vinna á húsnæði skólans eða eigum hans skulu þeir bæta að fullu.
• Neysla nikótíns eru bannað í skólanum, m.a. sígaretturm, rafrettur/veipur, munntóbak, níkótínpúðar, neftóbak ofl. Þessi regla nær yfir öll húsakynni skólans og lóð hans, á samkomum í nafni skólans og ferðum á vegum hans.
• Stranglega er bannað að hafa áfengi og önnur vímuefni um hönd eða vera undir áhrifum þeirra í húsakynnum skólans, á lóð hans og öllum samkomum og ferðum á vegum skólans. 
• Nemendum er óheimilt að bera vopn í skólanum. Hvort sem um er að ræða hnífa, skotvopn, rafbyssur eða önnur þau vopn sem falla undir skilgreiningar vopnalaga 1998 nr. 16. 

Brot á þessum reglum eru litin alvarlegum augum. Brjóti nemandi reglur skólans fær hann viðvörun, þar sem það á við er brotið tilkynnti til barnaverndaryfirvalda og eftir atvikum til lögreglu. Ítrekuð brot á skólareglum geta leitt til brottvísunar. Forsjáraðilum ólögráða nemenda er gert viðvart svo þeir geti nýtt andmælarétt sinn. 

Uppfært febrúar 2026