Rafvirkjun

Lýsing: Störf rafiðnaðarmanna eru marg­vísleg. Allt frá því að leggja háspennu­línur til þess að setja saman örmerki fyrir dýr. Rafvirkjar vinna mjög fjöl­breytt störf í rafiðngeir­anum. Þeir leggja raf­magn í nýbygg­ingar, setja upp raf­magn­stöflur, dósir, tengla og rofa og lýs­ingu ásamt net­kerfum. Þar sem tölvu­stýrð kerfi eru for­rita þeir jafn­framt kerfin. Raf­virkjar vinna mikið í iðnaði við raf­vélar og stýr­ingar, bæði við upp­setn­ingar og viðhald.

Markmið rafvirkjabrautar er að búa nemendur undir að geta starfað sjálfstætt við almenn störf rafvirkja. Að loknu námi eiga nemendur að þekkja og kunna að vinna með helsta tækjabúnaði sem notaður er af rafvirkjum, geta lagt rafmagn í byggingar, unnið við stýringar og rafvélar. Nemendur verða færir um að starfa við framleiðslu og dreifingu raforku. Rafvirki á hæfniþrepi 3 býr yfir hæfni til að vinna sjálfstætt, veita ráðgjöf, gera ítarlegar tíma- og kostnaðaráætlanir sem og skila sinni vinnu í samræmi við væntingar. Hann hefur djúpan skilning á þeim búnaði, verkferlum og fræðum sem snúa að hans vinnu. Hann getur viðað að sér aukinni þekkingu í samræmi við þau verkefni sem fyrir liggja með því að nýta sér miðla og upplýsingar sem snúa að faginu og notað hina auknu þekkingu við störf sín.

Inntökuskilyrði: Nemendur sem lokið hafa grunndeild rafiðna og vélfræðingar geta sótt um á rafvirkjabraut. Samhliða námi hefja nemendur samn­ingsleið sem felur í sér störf í umsjón meistara. Meistari og nemi votta hæfniþrep sem áskilin eru í rafrænni ferilbók. Að lok­inni útskrift og fer­ilbók öðlast nemandinn rétt á að fara í sveins­próf.

Skipulag: Rafvirkjanám er starfsnám sem lýkur á þriðja hæfniþrepi og er í heildina 225 einingar. Nám í rafvirkjun byrjar á grunnnámi rafiðna sem er alls 120 einingar og raðast á 4-5 annir. Námið er að mestu fagbóklegt og verklegt og kennt í verkefnastýrðu námi. Nám í rafvirkjun er bæði bóklegt og verklegt. Það skiptist í bóklegt og verklegt nám í skóla ásamt starfsþjálfun í atvinnulífinu. Starfþjálfun á vinnustað jafngildir 80 einingum. Nemendur stunda starfsþjálfun á vinnustað og ber iðnmeistari ábyrgð á að nemandinn öðlist viðeigandi þjálfun og færni. Eftirfylgni og eftirlit er framkvæmt með ferilbók. Til að ljúka námi í rafvirkjun þarf að ljúka öllum hlutum náms, þar með talið starfsþjálfun sem staðfest er með uppfylltum skyldum í rafrænni ferilbók. Eftir útskrift getur nemandinn þreytt sveinspróf sem veitir honum starfsréttindi.

Hæfniviðmið: Að loknu námi skal nemandi búa yfir:

• hæfni til að setja upp og hafa eftirlit með raflögnum og rafbúnaði í byggingum, skipum, bátum og raforkudreifikerfum, í samræmi við gildandi reglugerðir og staðla.
• hæfni til að annast viðhald rafvéla og raftækja ásamt nýlögnum og rekstri rafkerfa í farartækjum á sjó og landi.
• hæfni til að lesa raflagnateikningar vegna uppsetningar, bilanaleitar og viðhalds rafbúnaðar. Hann skal geta útskýrt virkni búnaðarins út frá teikningum, magntaka og vinna verkáætlanir eftir þeim.
• hæfni til að þekkja búnað raftækja, rafvéla, iðntölvustýringa, stýribúnaðar og forritanlegra raflagnakerfa og geta annast uppsetningu þeirra og viðhald.
• grunnþekkingu á vélbúnaði og hugbúnaði tölvukerfa og þekkja helstu hugtök er varða lýsingartækni og geta ákvarðað lýsingarþörf við mismunandi aðstæður.
• hæfni til að nota viðeigandi mælitæki við störf sín og framkvæma bilanaleit og viðgerðir á rafbúnaði og raflögnum.
• hæfni til að tryggja öryggi og viðhafa viðeigandi varnarráðstafanir í rafiðnaði og þekkja eftirlitsstofnanir og hlutverk þeirra vegna eftirlits og öryggismála.
• ábyrgð á eigin starfsþróun, vera fær um að tileinka sér nýjungar og hagnýta þá þekkingu í starfi.
• Fagmennsku og siðferðisvitund starfa í samræmi við siðareglur greinarinnar og vinnustaðarins.
• hæfni til að tjá sig af öryggi, munnlega og skriflega, s.s. með verkdagbókum, vinnuseðlum og skýrslum.
• hæfni til að vinna sjálfstætt, meta eigin getu og forgangsraða viðfangsefnum. Greina hvaða aðferðir eiga við hverju sinni og rökstyðja þær aðferðir sem hann notar.
• hæfni til að leiðbeina öðrum, sýna leikni í samstarfi og samskiptum við samstarfsfólk og taka fullt tillit til þarfa viðskiptavina og aðstæðna.

Einingafjöldi : 225 einingar